Kulliyadda Culuumta Bulshada ee Jaamacadda Ummadda Soomaaliyeed (JUS), ayaa uqabatay Ardayda qaybta Saxaafada ee Diplomaha tababar socon doona mudo afar maalin ah, kaas oo ku saabsan soosaarista muuqaalada.
Tababarka oo lagu qabtay Hotel Jazeera ee magaalada Muqdisho ayaa ujeedkiisu ahaa in ardayda lagu baro xirfadaha isticmaalka kaamirooyinka, iftiinka, dhawaaqa, iyo habaynta muuqaalada.
Hormuudka Kulliyadda Culuumta Bulshada Jaamacadda Ummadda Soomaaliyeed, Dr. Cabdulqaadir Maxamed Dhicisow oo shalay furay tababarka, ayaa ka hadlay muhiimada uu u leeyahay ardayda wuxuuna sheegay in uu xirfadahooda warbaahinta sare u qaadi doono, isaga oo kula dardaarmay in ay si wanaagsan uga faa`iidaystaan, wuxuu kale oo iftiimiyay in ay sii wadi doonaan barnaamijyada nuucaan oo kale ah ee lagu dhisayo xirfadaha ardayda.
Tababarka ayaa waxaa casharo ka bixinayay macalimiin ka socodatay hay`adaha IMS iyo FOJO Institute oo taageera barnaamijka Diplomaha Saxaafada JUS, Tababarka waxaa sidoo kale goob joog ka ah qaar ka mid ah macalimiinta iyo shaqaale qaybta saxaafada Kulliyadda Culuumta bulshada. https://universityofsomalia.net/
