Naadiga Ardayda Jaamacadda Ummadda Soomaaliyeed ayaa shalay qabatay doorashada Guddoomiyaha Naadiga Ardayda Jaamacadda. Doorashada oo ka dhacday Jaamacadda ee Gahayr, km4 iyo Shabeelle ee magaalada Muqdisho, waxaana ka qeyb galay codaynta 3,396 arday.
Raktarka Jaamacadda Ummadda Soomaaliyeed Dr. Xasan Cumar Mahadallah, Wasiirka Arrimaha Gudaha, Mudane Axmed Macalin Fiqi, Wasiirka dhalinyarada iyo ciyaaraha Mudane, Maxamed Barre Maxamuud, Wasiiru Dowlaha Wasaaradda Waxbarashadda, Hiddaha iyo Tacliinta Sare Marwo, Nuura Mustaf Guudow, Agaasimaha Tacliinta sare ee Wasaaradda Waxbarasahda, iyo marti-sharaf kale, ayaa goob-joog ka ahaa doorashada Naadiga ardayda.
7-musharax ayaa ku tartamay xilka guddoomiyaha, halka guddoomiye ku xigeen ay u tartameen labo murashax. Doorasho dheer oo loollan dheer ka dib, Faarax Nuur Salaad ayaa ku soo baxay doorashada guud ee gudoomiyaha, halka Rowda Maxamed Maxamuud ay ku guuleysatay doorashada guddoomiye ku-xigeenka waxaana la tirinayay codadka doorashada ilaa saqdii dhexe ee xalay doorashada.
Natiijada ayaa sidaan u kala dhacday
Xilka Guddoomiyaha Naadaadiga Ardeyda waxaa isku soo sharaxda 7 musharax kuwaas oo kala ah:-
- Faarax Nuur Salaad oo helay 1199 oo cod.
- Miikaa’iil Garaad Faarax oo helay 853 oo cod.
- Cabdiraxmaan Cabdullaahi Buulle oo helay 805 oo cod.
- Cabdiqaadir Muuse Caraaye oo helay 422 oo cod.
- Cabdifitaax Cabdirisaaq Maxamed oo helay 292 oo cod.
- Cabdiraxmaan Maxamuud Cabdi (Seeko) oo helay 286 oo cod
- Shaafici Cabdi Dhugad oo helay 139 oo cod.
Xilka Guddoomiye ku xigeenka Naadiga Ardeyda waxaa isku soo sharaxday laba musharax oo kala ah:
- Rowda Maxamed Maxamuud oo heshay 1918 oo cod.
- Saynab Axmed Cabdikariin oo heshay 1837 oo cod
Tirada guud ee codeysay 3396 Ardey waxaa halaabay Codod gaaraya 241.
Guusha Faarax ayaa waxaa u dabaal degay ardayda Jaamacadda ee goobta ku sugnaa, iyagoo ku ammaanay xirfadiisa hoggaamineed iyo sida ay uga go’an tahay horumarinta ardayda jaamacadda. Waxa uu ballan qaaday in uu si dhow ula shaqeyn doonto maamulka jaamacadda si ay ardaydu u helaan waxbarasho iyo taageero wanaagsan.
Dhanka kale, Rowda oo ku guuleysatay doorashada guddoomiye ku xigeenka ayaa sheegtay in ay la shaqeyn doonto gudoomiyaha, ardayda JUS iyo gudoonka, sidoo kale waxa ay u mahad celisay hogaankii hore ee ardayda Jaamcadda.
Agaasimaha Arrimaha Bulshada Jaamcadda Ismaciil Cabdullahi Ibraahim ayaa u mahad celiyay dhamaan dadkii ka qayb qaatay qabsoomida doorashada aadka u qiimaha badan gaar ahaan gudiga qabanqaabada doorasahda ee ardaydan JUS. Wuxuu kale uu u mahadceliyay dhamaan mas`uuliyiintii dhiiri galinta iyo kor joogtaynta ugu yimid oo ay ugu horaayaan maamulka sare ee jaamacadda, Wasiirada XFS iyo marti-sharafta kale.
Doorashadan ayaa ahayd mid xamaasad iyo xiiso gaar ah leh, waxaana ay ka muuqatey xamaasadda iyo dadaalka ay ardayda Jaamacadda Ummadda Soomaaliyeed u hayaan waxbarashadooda iyo bulshadooda.