Raktarka Jaamacadda Ummadda Soomaaliyeed, Barfasoor Xasan Cismaan Gacal ayaa soo gabagabeeyey booqasho muhiim ah oo uu ku tagay dalka Finland, taas oo qayb ka ah xoojinta sare u qaadista iskaashiga dhanka waxbarashada ee labada dal.
Prof. Gacal oo ay wehliyaan hormuudka kulliyadda culuumta bulshada Prof. Cabdulqaadir Maxamed Dhicisow iyo Dr. Mulki Cilmi Rooble iyo xubno kale oo ka socday wasaaradda Caafimaadka ayaa wada hadalo wax ku ool ah la yeeshay mas’uuliyiinta dalka Finland sida Wasaaradda Arrimaha Dibadda, Golaha Waxbarashada Qaranka Finland, xafiiska IOM, Isbitaalada Jaamacadaha Helsinki iyo Metropolia. Wafdiga ayaa sidoo kale kulamo la qaatay Jaaliyadda Soomaaliyeed ee dalka finland.
Kullamada Raktarka iyo wafdiga la socday ayaa ku qotomay sidii ay Finland u taageeri lahayd waxbarashada iyo Caafimaadka Soomaaliya, iyada oo la isla gartay qodobo ay ka mid yihiin taageerida tababarrada iyo in la balaariyo iskaashiga Jaamacadda Ummadda iyo Jaamacadaha dalka Finland.
